- Herritar arduratsuak, autonomoak, kritikoak eta enpatikoak nahi ditugu; horregatik, CMT Hezkuntza Fundazioan sinetsita gaude gure ikasleak modu integralean prestatu behar ditugula, etengabe aldatzen ari den mundu batean moldatzen jakin dezaten.
- Ingurune ezegonkor batean, balioak, gaur inoiz baino gehiago, hezkuntzaren bidez gure haurrei utziko diegun ondarearen funtsezko zutabea dira.
Funtsezko gai bat
Garapen pertsonalari laguntzeaz harago, balioek gizarte-bizikidetza sendotzen dute. UNESCOk dio gure eskoletan eta ikastetxeetan errespetua, zintzotasuna eta elkartasuna bezalako balioak funtsezkoak direla gizarte bidezkoagoak eta kohesionatuagoak sustatzeko.
Gainera, hainbat ikerketak frogatu dute hezkuntza integrala jasotzen duten ikasleek ongizate emozional handiagoa eta pertsonen arteko harreman hobeak dituztela.
Ildo horretan, Hezkuntzarako Mundu Itunak, Frantzisko aita santuak 2019an sustatuak, ikasleak akademikoki prestatzeaz gain printzipio etiko sendoak garatzen lagunduko dien hezkuntza integral eta humanistaren beharra nabarmentzen du. Ekimen horrek familien, irakasleen eta, oro har, gizartearen arteko erantzukizun partekatuaren garrantzia azpimarratzen du, etorkizun bidezkoagoa eta jasangarriagoa eraikitzeko.
Garapen Jasangarrirako 2030 Agendak dio balio unibertsalei esker GJHak «benetan eraldatzaileak izan daitezkeela, pertsona eta haren berezko duintasuna garapen-ahaleginen erdigunean jartzen dituztelako eta pertsona guztiak ahalegin horretako kide aktibo bihurtzeko gaitzen dituztelako».
Elkarlana
Hurbilen dugunetik hasita: etxeko balioak eta ikasgelako balioak…
Horri dagokionez, familiak eta eskolak bateragarriak izateaz gain, elkarrekin jardun behar dute. Horrela baino ez dugu lortuko ingurune seguruagoak sortzea eta gure seme-alabak eta ikasleak heldu orekatu, konprometitu eta zoriontsu bihurtzeko aukerak areagotzea.
Ez da curriculum kontu bat: balioak zeharkako ardatza dira hezkuntzaren etapa eta arlo guztietan, Haur Hezkuntzako lehen urteetatik Lanbide Heziketara edo unibertsitate-ikasketetara.
Gizarte gizatiarragoa, mundu bizigarriagoa
Bizitzarako ikastea. Horretaz ari gara hezkuntzako balioez hitz egiten dugunean. CMT Hezkuntza Fundazioan, balio hauek gure DNAren parte dira:
- Koherentzia
- Erantzunkidetasuna
- Konpromisoa
- Aintzatespena
- Transzendentzia
- Sen kritikoa
- Harrera
- Alaitasuna
- Hobetzeko grina
- Eskuzabaltasuna
Gure karisma palautarra
Gure hamabi ikastetxeetan balioetan hezteaz hitz egitea gure fundatzaile Francisco Palau I Querri eta «bizitza kristau konprometitu baterako hezteko» zuen uste sendoari buruz hitz egitea da.
Horregatik, hala jasotzen dugu gure Fundazio-gutunean: «Haur eta gazte guztiei irekitako hezkuntza eskaintzea, bereziki gizartean egoera ahulenean daudenei, pertsonarekiko errespetutik abiatuta, bizitzaz eta Jainkoak ematen dizkion dohainez jabetu dadin, gizateriarekin eta sorkuntzarekin komunioan bizitzera bultzatuko duen eragile gisa. Egungo egoerei eta garai eta leku bakoitzaren eskakizunei erantzungo dieten prestakuntza-, berrikuntza pedagogiko- eta partaidetza-prozesuak ahalbidetzeko beharrezko baliabideak eskaintzea».
Laburbilduz…
Balioetan heztea ez da aukera bat; ezinbesteko baldintza da etorkizuneko erronkei aurre egiteko prestatuta dauden herritar zintzoak hezi nahi baditugu. Hezkuntza-etapa edozein dela ere, haurtzarotik unibertsitatera, balioek funtsezko zutabea izan behar dute gure ikastetxeetan. Horrela baino ez dugu lortuko hain beharrezkoa dugun gizarte etikoagoa, bidezkoagoa eta solidarioagoa.
